हरिः ओम्

Select Sloka Script in Devanagari / Telugu/ Kannada/ Gujarati /English

સુન્દરકાણ્ડ્.
અથ ચતુર્થઃ સર્ગઃ

સ નિર્જિત્ય પુરીં શ્રેષ્ઠાં લઙ્કાં તાં કામરૂપિણી|
વિક્રમેણ મહાતેજા હનુમાન્ કપિસત્તમઃ||1||

અદ્વારેણ મહાબાહુઃ પ્રાકારમભિપુપ્લુવે |
પ્રવિશ્ય નગરીં લઙ્કાં કપિરાજહિતંકરઃ||2||

ચક્રેઽથ પાદં સવ્યં ચ શત્રૂણાં સ તુ મૂર્થનિ|
પ્રવિષ્ઠ સત્વ સંપન્નો નિશાયાં મારુતાત્મજઃ||3||

સ મહાપથમાસ્થાય મુક્તપુષ્પ વિરાજિતમ્|
તતસ્તુ તાં પુરીં લઙ્કાં રમ્યાં અભિયયૌ કપિઃ||4||

હસિતોત્કૃષ્ણનિનદૈ સ્તૂર્યઘોષપુરસ્સરૈઃ|
વજ્રાંકુશનિકાશૈશ્ચ વજ્રજાલવિભૂષિતૈઃ||5||

ગૃહમેઘૈઃ પુરી રમ્યા બભાસે દ્યૌ રિવાંબુધૈઃ|
પ્રજજ્વાલ તદા લઙ્કા રક્ષોગણગૃહૈ શ્શુભૈઃ||6||

સિતાભ્રસદૃશૈશ્ચિત્રૈઃ પદ્મસ્વસ્તિકસંસ્થિતૈઃ|
વર્થમાન ગૃહૈશ્ચાપિ સર્વત સ્સુવિભૂષિતા||7||

તાં ચિત્રમાલ્યાભરણાં કપિરાજહિતંકરઃ|
રાઘવાર્થં ચરન્ શ્રીમાન્ દદર્શચ નનંદ ચ ||8||

ભવનાદ્ભવનં ગચ્છન્ દદર્શ પવનાત્મજઃ|
વિવિધાકૃતિરૂપાણિ ભવનાનિ તતસ્તતઃ||9||

શુશ્રાવ મથુરં ગીતં ત્રિસ્થાનસ્વરભૂષિતમ્ |
સ્ત્રીણાં મદસમૃદ્ધાનાં દિવિચાપ્સરસામિવ ||10||

શુશ્રાવ કાઙ્ચી નિનદં નૂપુરાણાં ચ નિસ્સ્વનમ્|
સોપાનનિનદાંશ્ચૈવ ભવનેષુ મહાત્મનામ્ ||11||

અસ્ફોટિતનિનાદાંશ્ચ ક્ષ્વેળિતાંશ્ચ તતસ્તતઃ|
શુશ્રાવ જપતાં તત્ર મંત્રાન્ રક્ષોગૃહેષુવૈ||12||

સ્વાધ્યાયનિરતાંશ્ચૈવ યાતુધાનાન્ દદર્શ સઃ|
રાવણ સ્તવસંયુક્તાન્ ગર્જતો રાક્ષસાનપિ||13||

રાજમાર્ગં સમાવૃત્ય સ્થિતં રક્ષો બલં મહત્|
દદર્શ મધ્યમે ગુલ્મે રાવણસ્ય ચરાન્બહૂન્||14||

દીક્ષિતાન્ જટિલાન્ મુણ્ડાન્ ગોઽજિનાંબરવાસસઃ|
દર્ભમુષ્ટિપ્રહરણાન્ અગ્નિકુણ્ડાયુધાં સ્તથા||15||

કૂટમુદ્ગરપાણીંશ્ચ દણ્ડાયુધધરાનપિ|
એકાક્ષાન્ એકકર્ણાંશ્ચ લંબોદરપયોધરાન્||16||

કરાળાન્ ભુગ્નવક્ત્રાંચ વિકટાન્ વામનાંસ્તથા|
ધન્વિનઃ ખડ્ગિનશ્ચૈવ શતઘ્ની મુસલાયુધાન્||17||

પરિઘોત્તમહસ્તાંશ્ચ વિચિત્ર કવલોજ્જ્વલાન્|
નાતિસ્થૂલાન્ નાતિકૃશાન્ નાતિદીર્ઘાતિહ્રસ્વકાન્||18||

નાતિગૌરાન્ નાતિકૃષ્ણાન્ નાતિકુબ્જાન્ન વામનાન્|
વિરૂપાન્ બહુરૂપાંશ્ચ સુરૂપાંશ્ચ સુવર્ચસઃ||19||

ધ્વજીન્ પતાકિનશ્ચૈવ દદર્શ વિવિધાયુધાન્
શક્તિવૃક્ષાયુધાંશ્ચૈવ પટ્ટિસાશનિધારિણઃ||20||

ક્ષેપણીપાશહસ્તાંશ્ચ દદર્શ સ મહાકપિઃ|
સ્રગ્વિણસ્ત્વનુલિપ્તાંશ્ચ વરાભરણ ભૂષિતાન્||21||

નાનાવેષ સમાયુક્તાન્ યથા સ્વૈરગતાન્ બહૂન્ |
તીક્ષ્ણશૂલધરાંશ્ચૈવ વજ્રિણસ્ય મહાબલાન્||22||

શતસાહસ્ર મવ્યગ્ર મારક્ષં મધ્યમં કપિઃ|
રક્ષોધિપતિનિર્ધિષ્ઠં દદર્શાંતઃપુરાગ્રતઃ ||23||

સ તદા તદ્ગૃહં દૃષ્ટ્વા મહાહાટકતોરણમ્|
રાક્ષસેંદ્રસ્ય વિખ્યાતમદ્રિ મૂર્ધ્નિ પ્રતિષ્ટિતમ્||24||

પુંડરીકાવતંસાભિઃ પરિઘાભિરલંકૃતમ્|
પ્રાકારાવૃત મત્યંતં દદર્શ સ મહાકપિઃ||25||

ત્રિવિષ્ઠપનિભં દિવ્યં દિવ્યનાદ વિવિનાદિતમ્|
વાજિહેષિતસંઘુષ્ટં નાદિતંભૂષણૈસ્તથા||26||

રથૈર્યાનૈર્વિમાનૈશ્ચ તથા હયગજૈ શ્શુભૈઃ|
વારણૈશ્ચ ચતુર્દંતૈ શ્શ્વેતાભ્રનિચયોપમૈઃ ||27||

ભૂષિતં રુચિર દ્વારં મત્તૈશ્ચ મૃગપક્ષિભિઃ|
રક્ષિતં સુમહાવીર્યૈ ર્યાતુધાનૈ સ્સહસ્રશઃ||
રાક્ષસાધિપતેર્ગુપ્ત માવિવેશ મહાકપિઃ||28||

સહેમજાંબૂનદચક્રવાળમ્
મહાર્હમુક્તામણિભૂષિતાંતમ્|
પરાર્થ્યકાલાગરુચંદનાક્તમ્
સ રાવણાંતઃપુરમ્ આવિવેશ||29||

ઇત્યાર્ષે શ્રીમદ્રામાયણે આદિકાવ્યે વાલ્મીકીયે
ચતુર્વિંશત્ સહસ્રિકાયાં સંહિતાયામ્
શ્રીમત્સુન્દરકાણ્ડે ચતુર્થસ્સર્ગઃ||

|| Om tat sat ||